نصائح مهمة قبل أن تشترى موبايل مستعمل

السلام عليكم و رحمة الله وبركاته

أقدم لكم بعض النصائح البسيطة عند شراء جهاز موبايل مستعمل

1- أول شىء تنظر على ظهر الجهاز تحت البطارية لترى السيريال وبلد المنشأ و قارن السيريال بالسيريال التانى اللى على الكرتونة و لازم يكونو زى بعض و إلا تبقى مش كرتونته و يعتبر الجهاز بدون كرتونة

2- ياريت يكون الغطاء الخارجى لا يحتوى على عدد كبير من الخدوش وكلما زادت الخدوش كلما قل سعر الجهاز طبعا ولكن الخدوش البسيطة عادى مفيش مشكلة منها (ده طبعا بعد ماتتأكد إنه الكفر الأصلى)

3- حط شريحة فى الجهاز وشغله وانظر إلى أبراج الشبكة و إذا لم تجد شبكة ضع الشريحة بجهاز آخر حتى تتأكد إذا كان العيب فى الجهاز ولا فى تغطية الشبكة نفسها

4- اعمل مكالمة بالجهاز وتأكد ان انت سامع و ان المتحدث سامعك (اخوك مثلا)

5- حط الجهاز فى الشاحن و انظر إلى أبراج الشحن و شوفها بتتحرك واللا لأ و مهم كمان تسيبه شوية فى الشحن عشان تعرف الجهاز بيسخن من الشحن واللا لأ

6- افتح البلوتوث وجرب تبعت ملف و جرب تستقبل ملف

7- شعل النغمات وتأكد إن مافيهاش زنة قوية أو رعشة وزود الصوت و وطيه وقارن الصوت بصوت جهاز تانى من نفس النوع إن أمكن وماتنساش تجرب الهزاز (vibration)

8-دخل بطاقة ذاكرة وتأكد إن الجهاز قاريها وجرب تمسح منها ملف

9- جرب زراير الجهاز كله واحد واحد كذة مرة

10- افتح الكاميرا وخذ كام صورة وجرب الفلاش

11- إذا كان الجهاز فيه وايرلس جرب تشغله على شبكة قوية

12- لتعرف إذا كان الجهاز مفتوح أم لا انظر على المسامير فى الخلف و الأمام لترى إذا كان بها خدوش أو أثر فك أو إذا كانت المسامير كلها مش شبه بعض و كل واحد مختلف عن التانى

13- لا تنسو إخوتى أن الكرتونة والكفر الأصلى و الاكسسوارات الأصلية بتفرق فى سعر الجهاز

14 - تأكد من البطارية هل هي أصلية أم لا , وكذلك تأكد من فعاليتها فقد تكون مستهلكة

لأنه من المعروف أن لكل بطارية عمر افتراضي .

15- تأكد من السنة الأولى في الضمان لانها ضمان شامل

16 - تأكد من عداد المكالمات الصادرة والواردة فهو يبين لك تقريبا حالة استخدام الجهاز ...

أرجو ألا أكون قد نسيت شيئا
وياريت اللى عنده معلومة زيادة يقولنا عليها