أنا المواطن مطحون
تلاقيني في المواصلات دايما معجون
وفي الشغل بين الدفاتر مدفون
في السقعة ميت مالبرد مزكوم
سامعني كويس؟...أنا المواطن مطحووووون
هيكل عظمي تايه في هدوم
باقضي تلت تربع السنة صوم
ويوم ما أفطر ألاقيها بصل وتوم
إوعي تنساني ...أنا المواطن مطحون
أنا اللي باتمنى يوم دش بمية وصابون
يمكن أطول المية ...لكن مش دايما فيه صابون
ده أنا غلبان في عالم مجنون
صدقني أنا أخوك ...المواطن مطحون
المدام حبت تربطني ...جابت عيال بالكوم
وعلىّ اصرف عليهم..ولو أعيش معدوم
يا كده يا يشحتوا من الخلق رحمة وعون
يا ريت تحس بي ...أنا المواطن مطحون
أنا اللي عايش شبه معدوم
يا مين يلحقني بشوية هدوم
ولقمة نضيفة فيها شبع البطون
ورسالة أخيرة من المواطن مطحون
طول عمري أنا عايش محروم
خد بيدي...مد لي العون
قبل ما ييجي أجلي..وآخد لقب مرحوم
انا المواطن مطحوووووووون
_________________________
السبت 16 أكتوبر 2010, 10:13 pm
